గంటాపై సీఎం సీరియ‌స్‌

ఏపీ ముఖ్య‌మంత్రి చంద్ర‌బాబు నాయుడు త‌న మంత్రుల ప‌నితీరుపై ఒకింత అస‌హ‌నం వ్య‌క్తం చేస్తున్నారు. అంతేకాదు వాళ్లపై సీరియ‌స్‌కూడా అవుతున్నారు. మ‌రీ ముఖ్యంగా విద్యాశాఖ మంత్రి గంటా శ్రీ‌నివాస‌రావుపై . మొన్నీమధ్య విజయవాడలో వీడియో కాన్ఫరెన్స్ నిర్వహించిన చంద్రబాబు… విద్యాశాఖలో బదిలీలు ఎంతవరకు వచ్చాయని గంటాను ప్రశ్నించారట. అయితే ఒక ఉన్నతాధికారి విదేశీ పర్యటనలో ఉన్న కారణంగా ఈ ప్రక్రియ కొంత ఆలస్యమవుతోందని గంటా సమాధానం ఇచ్చారట. దీనిపై ఆగ్రహం వ్యక్తం చేసిన చంద్రబాబు… పాఠశాలలు తెరుచుకుని ఇన్ని రోజులు గడుస్తున్నా ఇంకా ఈ ప్రక్రియ చేపట్టకపోవడం ఏంటని గంటాను నిల‌దీశార‌ట‌. అంతేకాదు ఈ విషయం తాను గుర్తుచేసే వరకు తన దృష్టికి తీసుకురాకపోవడంపైనా ఆయన గంటాకు క్లాస్ తీసుకున్నట్టు సమాచారం. ఇలాంటి క్లాసులు మంత్రి గంటాకు కొత్త‌కాదు! ఆ మధ్య జరిగిన మంత్రి వర్గ సమావేశంలో సీఎం చంద్రబాబు గంటా ఇచ్చిన ఫైల్ ను చూడకుండానే విసిరేశారని వార్తలు వచ్చాయి.
ఆ తరువాత కూడా గంటా శ్రీనివాసరావు పనితీరుపై చంద్రబాబు అసంతృప్తిగానే ఉన్నారని టీడీపీ వర్గాలు అంటున్నాయి. ఈ నేప‌థ్యంలో తాజా ఘ‌ట‌న ప్రాధాన్యం సంత‌రించుకుంది. గంటా ప‌రిస్థితి ఇలావుంటే రేపోమాపో చేప‌డ‌తార‌ని భావిస్తున్న మంత్రివ‌ర్గంలో ఆయ‌న‌కు ఉద్వాస‌న త‌ప్ప‌ద‌నే ఊహాగానాలు మొద‌ల‌వ‌డం గ‌మ‌నార్హం.