ఒలింపిక్స్ లో మ్యారేజ్ ప్రపోజల్..!

రియో ఒలింపిక్స్ లో అద్భుతాలు జరుగుతున్నాయి. అలాగే కొన్ని ఆశక్తికర సన్నివేశాలు కూడా చోటు చేసుకుంటున్నాయి. ఒలింపిక్ సాక్షిగా ఓ యువకుడు.. ఓ క్రీడాకారిణికి తన ప్రేమను వ్యక్తం చేశాడు. అయితే సదరు క్రీడాకారిణి ముందుగా షాక్ కు గురైంది. కాని తర్వాత అంగీకారం తెలిపింది. దీంతో ఆ యువకుడి ఆనందానికి పట్టపగ్గాల్లేవు.

క్వీన్ కాయ్ అనే యువకుడు, హెజీ అనే యువతి చైనాకు చెందినవారు. హెజీ డైవింగ్ పోటీల్లో పాల్గొంది. మహిళల డైవింగ్ 3 మీ. స్ప్రింగ్ బోర్డ్ విభాగంలో ఆమె రజత పతకం గెలుచుకుంది. ఆ పతకాన్ని తీసుకుంటున్న సమయంలో.. అక్కడికి క్వీన్ కాయ్ వచ్చాడు. పతకం తీసుకుని పోడియం దిశగా.. ఆమె బయలుదేరింది. ఇంతలో క్వీన్ కాయ్ ఆమె దగ్గరకు వెళ్ళి మోకాళ్ళపైన కూర్చుని.. గోల్డెన్ రింగ్ ని చూపించి పెళ్ళి చేసుకుందామా అంటూ అడిగాడు. దీంతో హెజీ ఆశ్చర్యానికి, ఆనందానికి గురైంది. అనంతరం.. ఆనందబాష్పాలతో ప్రియుడిని హత్తుకుని ఒకే చెప్పేసింది. ఈ యువకుడు తన ప్రేయసికి ఎర్ర గులాబీని కూడా కానుకగా ఇచ్చాడు.

అసలు విషయం ఏమిటంటే.. వీరిద్దరూ మంచి డైవర్లే. అంతేకాదు.. ఇరువురు గత ఆరేళ్ళుగా డేటింగ్ చేస్తున్నారట. క్వీన్ కాయ్ 3 మీటర్ల స్ప్రింగ్ బోర్డ్ లో కాంస్య పతకాన్ని గెలిచాడు. ఒలింపిక్స్ లో తన బాయ్ ఫ్రెండ్ తనకు ప్రపోజ్ చేస్తాడని ఊహించలేదని హెజీ తెలిపింది.