నీ కోసం ఎదురుచూపు పరిమళించె ఎదలోయల..!
నీ తలపుల వనములెన్నొ మొగ్గ తొడిగె ఎదలోయల..!
ఎపుడు ఎరుక కలిగిందో..ప్రేమ ఎలా విరిసిందో..!?
అపురూపమైన భావనమే పురులు విప్పె ఎదలోయల..!
చెలిమి కన్న మధురమైన..సంగతేమి ఉంది సఖా..!?
సప్తవర్ణ మిశ్రమమే మిగుల పొంగె ఎదలోయల..!
లోకాలను శ్వాసించే కళ ఏదో నేర్పినావు నేర్పకనే..!
నా నేనుల కలవరమే ఇగిరిపోయె ఎదలోయల..!
ఇన్నినాళ్ళు నీవెవరో నేనెవరో ఎంత గొడవ..!
బిడియపడే ద్వారాలే మాయమాయె ఎదలోయల..!
మాధవునకు చెప్పేందుకు ఏమున్నది ఇంతకన్న..!
క్రీడించే తరుణాలే పల్లవించె ఎదలోయల..!
Author:
Madhav Rao Koruprolu
If you like to publish news or your story on our website, please email to editor 'at' deccanabroad.com.
