నకిలీ వీసా కేసులో నయనతార..?

అందాల ముద్దుగుమ్మ నయనతార నకిలీ వీసా కేసులో పట్టుబడ్డారు. ఈ వార్త సోషల్ మీడియాలో హల్ చల్ చేసింది. నయన్ ప్రస్తుతం విక్రమ్ సరసన ఇరుముగన్ మూవీలో నటిస్తున్నారు. ఈ చిత్ర షూటింగ్ మలేషియాలో జరిగింది. అందులో పాల్గొన్న ఆమె తిరిగి ఇండియా బయలుదేరారు. ఇందులో భాగంగా మలేషియా ఎయిర్ పోర్టుకు చేరుకున్నారు. అయితే అక్కడ కేఎల్ 1.. కేఎల్ 2 అనే రెండు రకాల టెర్మినల్ విధానాలు అమలు చేస్తున్నారు. ఇక్కడే ఆమె కాస్త కంగారు పడ్డారు. కేఎల్ 1 టెర్మినల్ ద్వారా ప్రవేశించాల్సి ఉండగా.. కేఎల్ 2 టెర్నినల్ దగ్గరకు వెళ్ళారు. అక్కడ ఉన్న ఇమ్మిగ్రేషన్ అధికారులు వీసా తనిఖీ చేసి సరిగా లేవంటూ చెప్పారు. దీంతో చిన్నపాటి కలకలం రేగింది. అయితే వారికి నయనతార క్లారిటి ఇచ్చి ఇండియా చేరుకున్నారని ‘ఇరుముగన్’ చిత్ర బృందం తెలియజేసింది. ఈ మేరకు ఓ ప్రకటన కూడా విడుదల చేసింది.

అయితే ఈ సీన్ పై సోషల్ మీడియాలో ఓవర్ గా ప్రచారం జరిగింది. నయన్ నకిలి పాస్ పోర్టుతో అరెస్ట్ అయ్యారంటూ మలేషియా ఇంటర్నెట్ లో ప్రచారం కావడంతో.. చిత్ర యూనిట్ ప్రకటన చేసి వదంతులకు ఫుల్ స్టాప్ పెట్టింది. ఇటీవలె ఈ ముద్దుగుమ్మ ‘నానున్ రౌడిదాన్’ చిత్ర సన్నివేశంలో ఒక టాస్మార్క్ షాపులో మద్యం బాటిల్ కొంటున్న ఫొటో హల్ చల్ చేసిన విషయం తెలిసిందే. మళ్లీ పాస్ పోర్ట్ అంశంపై కూడా ప్రచారం జరగడంతో నయన్ నవ్వుకున్నారట.