కిమ్ జాంగ్ కఠిన నిర్ణయం తీసుకుంటారా..?

ఉత్తర కొరియా- అమెరికా, దక్షిణ కొరియా దేశాల మధ్య వివాదం రగులుతున్న విషయం తెలిసిందే. అయితే ఈ వివాదం రోజుకో కొత్త మలుపు తిరుగుతోంది. దక్షిణ కొరియా దేశాధ్యక్షుడి అధికారిక భవనం బ్లూ హౌస్‌ను నేలమట్టం చేయడానికి ఏర్పాట్లు చేయాలంటూ ఉత్తర కొరియా దేశాధ్యక్షుడు సైన్యానికి పిలుపునిచ్చిన విషయం తెలిసిందే. అయితే ఆ మరుసటి రోజే కిమ్ జాంగ్ బాంబు పేల్చారు. దేశం కోసం, అధ్యక్షుడిపై ఉన్న ప్రేమను, భక్తిని నిరూపించడం కోసం ప్రజలు 70 రోజుల పాటు కష్టపడాలని సూచించారు. ఈ డెబ్భై రోజులపాటు బద్దకాన్ని దూరంగా పెట్టాలన్నారు. దేశ భద్రతను దృష్టిలో పెట్టుకుని పనిచేయాలన్నారు. దేశానికి అవసరమయిన ఉత్పత్తులను తయారు చేయడానికి ప్రజలు అందరూ చాలా కష్టపడాలన్నారు. శత్రుదేశాలు తనను టార్గెట్ చేయడానికి ప్రయత్నిస్తున్నారని కిమ్ జాంగ్ భావిస్తున్న నేపథ్యంలో ఈ విధంగా ఉత్పత్తులను భారీగా తయారుచేసుకోవడానికి పిలుపునివ్వడం ప్రపంచ దేశాల్లో చర్చనీయాంశమైంది. తనకు వ్యతిరేకంగా జరుగుతున్న అమెరికా-దక్షిణ కొరియా సైన్యాల సైనిక కవాతు ఈ ఏప్రిల్‌తో ముగుస్తుంది. దేశ ప్రజలకు అవసరమయిన ఉత్పత్తులు రెడీ చేసుకున్న తర్వాత కిమ్ జాంగ్ కఠినమైన నిర్ణయం తీసుకునే అవకాశముందని ఉత్తరకొరియా అధికారులు చర్చించుకుంటున్నారని సమాచారం.